مجنون ممكن !!!!!

كنت قاعد زهقان
باصص من البلكونة على الجراج اللى قدام بيتنا
لقيت حاجة غريبة
العيال الصغيرين اللى شغالين فى الجراج
بلية وفلفل وسلكة والعتمونى
طفل اسمه العتمونى
بس يلا ما علينا
المهم
عاملين اعتصام قدام عربية الراجل صاحب الجراج
علشان يديهم ساعة راحة فى نص اليوم يلعبوا فيها كورة
ابو تامر صاحب الجراج واقف بعربيته عاوز يخرج
والعيال مش عاوزين يتزحزحوا من قدامه
مسك الشومة بتعته
فتح الباب
وقبل ما تدب رجله على الارض
العيال فص ملح واتنسف مش داب
ملقتش غير انى لازم اضحك
ضحكت ودخلت
جبت قناة دريم
بتفرج على وائل الابراشى
لقيته جايب مظاهرة برضه
والامن ماسك شوم برضه
الناس مش عاوزة تمشى برضه
واول ما قربولهم كله طار برضه
فتحت الجرنال
لقيت بكرة فى اعتصام من مديرى الفنادق
اعتراضا على ارتفاع اسعار اللحوم
حسيت انى لما هجيب جرنال بكرة هشوفهم بيجروا برضه
حسيت انى عايش فى ملل
قلت لنفسى ياترى لو انا الحكومة هعمل ايه ؟
هنفذ الطلبات ولا همسك الشومة ؟
قلت بلاش كلام فى ال................
بس قلت انا بئة هخليهم ينفذولى ولو طلب واحد
انا اللى هغير الروتين الممل ده
لبست هدومى
وسرحت شعرى
وحطيت البارفان
خدت سجايرى فى جيبى
وخدت كل فلوسى
بس علشان اشترى بيها شومة
ماهى رمز القوة فى مجتمعنا
قابلت واحد فى الشارع
هدومه معجبتنيش
ضربته لحد ما مات
والتانى شكله مش مريحنى
ضربته لحد ما مات
ورحت سلمت نفسى
اتحاكمت
حكموا عليا بالاعدام
استنيت اليوم ده بفارغ الصبر
لحد ما جم الصبح قالولى يلا
دخلت وانا بجرى على الاوضه
وقفت وقريت الفاتحة والشهادتين
لحد ما قالى المفتى نفسك فى ايه قبل ما تموت ؟
قولتله يااااااااااااااااااااااااااااااااااه
مكانش نفسى فى الدنيا غير انى اتسأل السؤال ده قبل ما اموت !!!!!!!!!!!!!!!!!!!!!!