ينة فليلة تمنع بلاوى كتيرة

اتقابلت انا وايمن صديقى العزيز
كعادتنا على طول بنقلب فى احوال البلد
اخر تعديل للدستور هيبقى امتى ؟
مين الريس اللى جاى ؟
ياترى معتمرى نويبع رجعوا ولا لأ ؟
لحد ما جابتنا السيرة لكنتاكى وسط البلد
ايه رايك فى الساندوتش الجديد بتاع كنتاكى ؟
لا يا عم دول بيقولوا الحكومة مستوردة فراخ مسرطنة
طب ماكدونالز
برضه اللحمة مسرطنة
لأ بئة هنروح دلوقتى وهتشوف
ركبنا المترو ونزلنا قدام الجامعة الامريكية
متجهين الى فرع كنتاكى الكائن بنفس الجوار
داخلين من الباب وقبل ما نفتحه سمعنا كلمتين افرنجى
وفى لحظة بنبص لمصدر صاحب الصوت
وقفنا قدام موقف اقل ما يقال عنه انه اهانة لكرامة المصريين
ياريته من حد غريب
لا مصرى زيي وزيك وزينا كلنا
مجموعة من السياح الاجانب تحديدا يابانيين
طالعين من كنتاكى
قابلهم طفل مصرى ماسك ايد والده
وبيشحت باليابانى
اللى انا وانت وانتى منعرفش نتكلمه
الناس مستمرين فى طريقهم
واخينا وابوه اللى المفروض كفيف بيجروا وراهم فى الشارع
قربوا منهم
والجروب فى طريقه برضه
قربوا اكتر
ومسكوهم من هدومهم فى طريقة توصف بأنها اجبار على دفع الحسنة
ملقوش غير انهم بكام ين
يخلصوا من الشحات وابوه
رموهم فى وشهم
وقال واحد فيهم بالعربى :
" انتم هكذا المصريون تلعنون الظروف والزمان والقدر ونسيتم ان تلعنوا انفسكم "
مقدرتش أرد واقوله لأ
وهقول لأ ليه ؟
ماحنا جوه بلدنا بنهين كرامتنا
وبره بلدنا برضه بنهين كرامتنا
الجشع غطى على مفهوم البلد والشرف والكرامة بالشكل ده
نترمى فى أى شغلانة
ونبات على الارصفة
علشان ترجع بكام ألف
وفى الاخر تسيبهم فى البحر وتطلع للى خلقك
ياترى الظروف هى اللى عملت فينا كده ؟
ياترى مصر تستحق مننا كده
ولا يمكن نفسنا هى اللى رخصت اوى كده
ولا ايه ؟