للروتين فى بلدى شئون

المشهد الاول التانى والاخير
الزمان : القرن الواحد والعشرين
المكان : مصر ام الدنيا
الأشخاص : انا وانت وانتى وهو وهى وكلنا + شخص قاعد على مكتب
الاحداث :
نزل فى كليتى اعلان عن معسكر رايح راس البر
قولت خير اهو الواحد يريح من عناء العام الدراسى الكبيس السابق
بأسبوع ترفيهى استعدادا لعام دراسى كبيس لاحق
روحت رعاية الشباب علشان ادفع الاشتراك
ادونى استمارة وقالى املاها وهاتها بكرة
خدت الاستمارة
متقسمة تلات اجزاء
الجزء الاول خاص بيا انا
الجزء التانى خاص بشئون الطلاب
الجزء التالت خاص بالطبيب
حاولت املا الاستمارة بالترتيب
مليت الجزء بتاعى
دخلت على الجزء التانى
روحت لشئون الطلبة
قابلنى واحد قولتله بعد اذنك عاوز اختم الاستمارة بتعتى
قالى سيبها وتعالى خدها بعد تلات تيام
يا عم الراجل التانى عاوزها بكرة
والله انا مش فاضى
ليه ..... دى مش هتاخد حاجة
لأ هتاخد ....... لسه هنبحث فى دفتر الطلاب
ونتأكد اذا كنت فى الكلية ولا لأ
نعم ....... فى الكلية ولا لأ..... امال كارنيه الكلية ده مزوره يعنى ولا ايه ؟
ماليش دعوة يا دكتور .... دى التعليمات .... ولا يعنى عاوزنى اخالف التعليمات
مش عارف ليه حسيت انى لو قولتله بكام ؟......... كان هيخالفها
قولتله طيب
بعد تلات تيام معادنا
قالى ايوة
مشيت وبعد تلات تيام رجعتله
قالى اطلع فوق اعمل الكشف الطبى
طلعت انى اشوف دكتور
مفيش
قابلتنى واحدة اشبه بمدرسات الالعاب
انت الطالب
ايوة انا ... حضرتك الدكتورة ؟
ايه مش عاجبك ؟
لأ العفو ازاى ؟
ها ..... بتشتكى من حاجة ؟
لأ
عندك هيستورى مرضى ؟
لأ
طيب خلاص امشى
بس كده هو ده الكشف الطبى
ايوة خلاص
طيب ..... فين الختم حضرتك
لأ
انا مش بتاعة مكاتب ..... انا دكتورة
طيب يا دكتورة اختمها فين ؟
مش شغلى ......
نزلت سألت بتاع شئون الطلبة
قالى روح مستشفى الطلبة فى عبده باشا
روحت هناك
فين الختم يا جدعان ؟
قالولى اطلع ادفع 5 جنيه فوق الاول
طلعت ودفعت
تعالى بكرة استلم الوصل
اصل الموظف مشى بدرى 3 ساعات
نعم ؟؟؟؟؟؟
ايه مش عاجبك ؟؟
لأ ..... عاجبنى
تانى يوم ........ استلمت الوصل
ها ... فين الختم ؟
قالى لأ
انت تروح عندك بئة شئون الطلبة علشان تختملك ختم الكلية وانا اضمن منين انك مش مزور الاستمارة دى
نعم ..... بعد كل ده ومزورها
دى القوانين يا دكتور ....... ولا عاوزنى اخالف القوانين ؟
لأ ......... ازاى
روحت شئون الطلبة
قالولى ايوة كده انت ماشى فى السليم
طيب يعنى كده خلاص
لأ .... لسه ..... الختم الطبى فى عبده باشا
قولتلهم انا لسه جاى من هناك
قالولى مالناش دعوة ..... دى التعليمات
قولتله ... وانت بسم الله ما شاء الله متقدرش تخالفها
قالى عليك نور
روحت هناك تانى
استنيت حضرة البيه الموظف فى مكتبه لحد ما جه علشان يختملى الورقة
ختمتها وروحت رعاية الشباب قالى معاد التسليم خلص
قولتله يا عم اصل الحكاية ....................
قالى ماليش دعوة دى تعليمات يا دكتور ولا ......................
قولتله بزمتك مين من اللى دفعوا الاشتراك سلموا الاستمارة
قالى ولا واحد
قولتله اومال هتطلعوا المعسكر بمين .........
قالى معرفش ... بس مقدرش اخالف التعليمات
وفى الاخر خدها
؟؟؟؟؟؟؟؟؟؟؟؟؟؟؟؟؟؟؟؟؟
لك ان تتخيل اننا فى القرن ال21
فى واحد
اسمه ( موظف حكومى )
بيقبض مرتب لوحده
بينزل من بيته الصبح بعد ما يكوى هدومه ويسرح شعره
ويروح يعد على مكتب
علشان يرفع ايده يحطها فى الختامة وبعدين ينزلها فى الاستمارة
حاجة مستفزة
ان واحد كل شغلته انه يرفع ايده وينزلها تانى
يعنى هو اللى من الاول خالص ده اللى فى رعاية الشباب
مش قادرين يسلموه الختم علشان يوفر على الناس كل العناء والمجهود والوقت ده
الموقف مستفز لدرجة انه اجبرنى على انى اكتب عنه
بس هنقول ايه ؟
تعليمات .......... قوانين ........... روتين
وعجبى