قلم رصاص

مش عارف والله فى حاجة غريبة فى الناس اليومين دول
موجة من الخنقة الشديدة بتجتاح حناجر افراد الشعب
حاسس ان مفيش حد طايق حد
الدنيا كلها بتغلى
والاسباب مختلفة
عم علاء البقال مش طايق زباينه
وعم محمود المكوجى مش طايق المكوة بتعته
الناس بتتلكك لبعض علشان تتخانق
فى ثورة داخلية جماعية فى نفوس الناس
مش عارف ده نتيجة كبت طويل
ولا خلاص طفح الكيل
لا الزبون اللى مش طايل رغيف العيش مرتاح
ولا صاحب الفرنة كمان مرتاح
لا اللى ساكن ب600 جنيه مرتاح
ولا اللى ساكن ب7 جنيه مرتاح
لا اللى محجوز على نفقة الدولة مرتاح
ولا الى بيجيله العشا من فرنسا مرتاح
ايه اللى حصل ؟
ايه اللى مخلى الناس تمشى فى الشارع تكلم نفسها
هل علشان مصطبحوش على رأى الواد اللى واقف فى كافيتريا الكلية لما سألته البنت وقالها
ولا علشان الواحد فيهم مش عارف منين ولا منين يلاحقلها
ولا يمكن علشان مش عارفين يودوا فلوسهم فين من كترها
ولا علشان ايه ولا ايه ولا ايه ؟
بهدوء بحس انى محتاج امشى وابعد عنها
وساعات بثور واقول امتى اهج منها
اصلى بتعدى عليا اوقات بحس انى فعلا مش ابنها ...................