عايش حياته فى كيس

ناس كتير حوالينا وقدامنا
عايشين معانا بس مش عايشين
موجودين بأجسادهم فقط
ميعرفوش فى الدنيا الا حاجة واحدة
اتجاه واحد حياته منصبة عليه
الاب عايش حياته علشان بس يجيب فلوس
الام عايشة الكوافير والنادى
ولو الحال على الأد
تبقى عايشة للمطبخ والغسيل
مبقاش للدنيا معنى
فين الاب اللى كان بيجمع ولاده على العشا
علشان كل واحد يحكى يومه
فين الام اللى مكانتش بتنام الا لما تاخد عيالها فى حضنها
ومتنامش الا لما تقفل الباب عليهم
كل واحد ليه دور فى الدنيا دى
من غيره التوازن هيختل
لكن ربنا مخلقكش علشان تروح الشغل
وتيجى تنام
علشان تقوم تروح الشغل
أنا شايف ان الانسان لازم بجانب دوره اللى ربنا خلقه علشانه
لازم يكون له دور فى التأثير فى المتغيرات اللى بتحصل حواليه
وان لم يكن
فأضعف الايمان ابداء الرأى
90% من طلاب الطب والهندسة والقمة العلمية
ميعرفوش صديق غير الكتاب
بما انى طالب طب وعايش وسط الناس دى
ممكن تكون ممتاز علميا
لكن
فاشل اجتماعيا
ضعيف أسريا
صاحب شخصية فاضية بمعنى أخص
طب تعالوا كده
نتخيل ان الشخص ده
حصلتله حاجة منعته عن أنه يؤدى دوره
حياته هتبقى عاملة ازاى
اكتئاب ..... نكد ..... يأس
انسان بلا هوية
واللى ممكن بدوره بعد كده يؤدى للانتحار
نفس الموقف بالظبط
لو قولنا لطالب طب
خلص وخد الشهادة وبأمتياز
بس مش هنشغلك دكتور
هيعمل ايه ؟ وايه هيكون رد فعله ؟
بصراحة
التعبير اللى أطلقه عليا عنان خيالى لما بدأت افكر فى الموضوع ده
ان الناس دى عايشة فى كيس
منعزلين عن العالم
ميعرفوش ايه اللى حصل النهارده ؟
ميعرفوش ايه اللى ممكن يحصل بكرة !
ياريت حتى لو كنت عايش فى الكيس ده دلوقتى
تلحق نفسك وتطلع منه
على الاقل هتشوف الدنيا يوم فى حياتك بلونها الطبيعى
مش بلون الكيس .................................