الزوجة التانية

مش فيلم سعاد حسنى ولكن استفسار وتوضيح لحاجة
بنشوفها على طول اذا مكناش عيشناها
ولمسناها على ارض الواقع ..........
انا مش هتكلم عن ايه اللى يخلى الراجل يتجوز؟؟؟؟؟؟؟؟؟
ولا عن اللى حدده الشرع ؟؟؟؟؟؟؟؟
ولبا عن انه المفروض يبلغ مراته الاولانيه ؟؟؟؟؟
لكن هنتكلم عن العلاقة بين الزوجتين
الاولى والتانية ...........
على طول بنشوف العلاقة بين الضراير (علاقه ندية)
وعندهم حق مع ان البدايه بتكون من الزوجة الاولى
بتشوف ان التانيه خطفت منها جوزهاوابو عيالها .........
وتبقى التانية فى نظرها خطافة رجالة وخرابة بيوت وما الى ذلك من صفات تلتصق بالزوجة الثانية فى مجتمعنا او فى اى مجتمع
ولو بتحب جوزها اوى تقول هى اللى لفت عليه وغوته
ولو مش بتحبه تقول عينيه زايغة
ومش بترجع الاسباب لنقص هى عيشت فيه جوزها
المهم ........
فى معظم الاحيان بتكون الزوجة الثانية بنت عادية او ست محتلامة
اتقدملها العريس المتجوز
ولأن فى بطالة = مفيش شغل = مفيش فلوس + زيادة الطلبات + ارتفاع نسبة الاناث بالمقارنة بالذكور اللى هى 9 : 1 = مفيش جواز = ارتفاع نسبة العنوسة فى البلد

بتضطر توافق ......
يعنى هى كانت قاعدة فى بيت اهلها وعريس اتقدملها ..........
وافق على شروطها وعلى شروط اهلها
وافقت تتجوزه
يبقى ليه المعاملة دى !!!!!!!!!!!!!

السبب هو حب التملك عند المراة
مش هقول طمع
لكن هو حب تملك وسيطرة
لغريزة من غرائز المرأة عموما .....
طبعا ده مش حكم ذكورى عنصرى لكن هى بتعكس التصرفات بين الزوجتين المشتركتان فى زوج واحد ......
بتشوف ان التانية اخدت منها حاجة ملكها او جزء منها مع انها ممكن تكون مش بتشوفه الا كل كام شهر ....
ولكن بمجرد ما تعرف انه اتجوز نار السيطرة مش الغيرة بتشتعل ...
مع عدم التعميم .. فى ناس لسه بتحب بجد

لكن فى كل الاحوال .... للأسف ... هى حواء ... نصف المجتمع ..............................................

0900 يا ترى مين خليفة (كرومبو)؟؟؟؟

كلنا شفنا فى رمضان اللى فات وقبل رمضان كمان وبنشوف لحد دلوقتى المفتش كرومبو....كانت حلقاته قبل رمضان أسبوعية لكنها بقت يومية فى رمضان
مانكرش ان حلقات المفتش كرومبو كانت مسليه
مع انها كانت بتتطرق للتفاهة فى بعض الاحيان لكنها كانت لذيذة فى معظم الاحيان .......
المهم انه فى الاخر مش عباره عن مسلسل او حلقات ترفيهة للاطفال اد ما كانت سلعة تجارية لجنى الاموال والتلاعب بعقول المصريين كبارا وصغارا
المغزى مكانش فى فكرة الحلقة او فى الافيهات اللى بتترمى بين ابطال الحلقة لكن المغزى فى كيفية استفزاز المشاهد....
استفزازه بأن المسابقة بسيطة وسهلة مما يدفع المشاهد الى التفكير واليقين بأنها فى متناول يده وانه يقدر يجنى ثمرة فى المكافأة وهو قاعد قدام التليفزيون....
بدون تعب او جهد....
واللى بدوره بيدى احساس بانى ممكن احقق الثروة بدون مجهود....
=زيادة البطالة يعنى مفيش شغل واللى شغالين مش عاوزين يشتغلوا
وده بالظبط اللى حققه المفتش كرومبو فى 30 يوم فى 30 يوم مده شهر رمضان وصلت ارباح الانتاج ل400 مليون جنيه مصرى اى ما يقرب من نصف مليار ..
ده المفتش كرومبو لوحده واللى ممكن نقول انه بيتمتع بنوع من المصداقيه لأن فى فائز حقيقى .....
ونتيجة لمصداقيته عند المشاهد من خلال الدعم بالظهور مع رؤساء احدى القنوات المحبوبة جدا لدى المشاهد فى رمضان قدر انه يحقق مكاسب اعلى ....
لكن على غرار كرومبو بتطلع مسابقات وحلقات ومسلسلات شبيه هدفها النصب .
بقت اى حاجة فى حياتنا ممكن نوصلها عن طريق الرقم السحرى (0900) المقال ده انا مكتبتوش علشان امدح او ازم فى كرومبو لكن علشان ننظر نظرة عميقة لواقع مجتمعنا .......
بنقول مفيش شغل والحكومة مش موفرة خدمات والنظام مش عارف ايه مع ان العيب فينا احنا بلد نامى وبنصرف 400 مليون على مسابقة واحدة ونقول مفيش فلوس مفيش شغل مفيش ومفيش والحقيقة ان مفيش وعى اصحوا يا مصريين قبل فوات الاوان ...............................

الجرايد المصرية

من زمان...........من ايام ثانوية عامة تقريبا...........
من قبل ما ابطل اقرأ جرايد......... انا اصلا مكنتش بجبها علشان اقرأها.......
كنت بجبها علشان الاسئلة اللى كانت بتنزل قبل الامتحانات..........
بس اهوه كنت بتسلى فيه طالما جبته....عمرى ما شفت مثلا سلسة مقالات بتكشف رجل اعمال فاسد من كبارات البلد....زى ما بنشوف فى الافلام .............عمرى مل لقيت تحقيق عن مجرم او تاجر مخدرات ساعد العنصر الصحفى فى القبض عليه......
الجرنال كله عبارة عن 16 صفحة 12 صفحة منهم اعلانات كمجمل
وال4 صفحات الباقية خبرين رياضة...وخبرين حوادث
وصفحة للوفيات والكلمات المتقاطعة وشوية اخبار لتامر على شيرين على عمرو دياب؟
وخبرين يفقعوا على المواطن البسيط اللى ميهموش لا تامر ولا شيرين ولا شيكابالا ولا حازم امام كل اللى يهمه
ازاى اليوم يعدى باقل الخساير المادية والنفسية والصحية
علشان يقدر يكمل رسالته فى شغله ويقدر يربى عياله....
وبيقولك فى جرنال اصفر وجرنال ابيض .
كل الجرايد فى مصر صفرا
الجرنال الاصفر اللى احنا عارفينه بتاع نانسى وهيفا وزوجات القديس
والجرنال الاصفر اللى احنا مش عارفينه وعامل فيها ابيض
الجرايد اللى بتشتريها كل يوم
ايه الفرق بين الاتنين
لو غابت الحقيقة الاتنين فى الحكم سواء..........
اخبارنا بقينا نعرفها من الجزيرة وشوية جر ايد اسرائيلية .
بالذمة مش حرام لكن برضه ليها فايدة اننا بنصح كل الرجال انهم يشتروا كل يوم جرنال على الاقل لانها اتضح فعلا انها بتزود الخصوبة عند الرجال وعجبى .....

سرير الرجل الايطالى

مش عارف .........بس من العنوان ........من الغلاف الاحمر القاتم
المطعم بصور النساء .....محسيتش ولو للحظة انه يستحق القراءة....
وعلشان كده قرأته ...... الكتاب لمحمد صلاح العزب......
مطبعة ميريت.......الكتاب اقل ما يوصف به انه أداه لتحريك الغرائز واثارة ما هو مكبوت من فتن
او شهوة جنسية .....
لا يمث للادب بصله لا فى بعض
العبارات التشبيهيه التى ان دلت فتدل على خيال مريض شهوانى
الكتاب يحكى قصة راجل لم تحدد ملته او جنسيته يقطن باحدى المساكن بايطاليا شغله
الشاغل متابعة عورات النساء والرجال من جيرانه .....
يسكن فى شقه مجاورة رجل ايطالى يتمنى بطل الكتاب لو انه مكانه لو للحظه ..........
يتابعه يعترى عورات النساء ويفعل مالم يأمر به دين ........
يتابع جاولته من النساء اثناء خلعهن ملا بسهن ..
ثم يختلى ليجامع كل هؤلاء فى خياله .........
ثم يعرض الكتاب جانبا من حياه الرجل الايطالى الساكن بجواره
مسلطا الضوء على الوجه الدينى لهذا الرجل الذى رفص
كل الاديان وتنكر لها جميعا مصمما على ان يخلق دينا جديدا يكون فيه
هو الا له الذى لن يخلق سوى النساء وزجاجات الخمر
الكاتب محمد صلاح العزب لم يراعى اننا فى بلد
شرقى مسلم التحرر فيه بحدود فأخد يصف
عمليه الجماع بشكل مقزز عنفوى شهوانى .......
لدرجة اننا لما عملنا معرض الكتاب السنوى كنشاط اسرى فى الكليه
اتكسفنا نحط الكتاب ضمن منشورات المعرض
اعتقد ان محمد صلاح العزب لازم يعيد النظر فى كتاباته
ولو قدر يجمع باقى النسخ من دور النشر يبقى عمل خير
البلد مش ناقصة ......البلد مش ناقصة
مش كفايه مفيش شغل =بطاله =مفيش فلوس=مفيش جواز
تبقى البلد مش ناقصه ...البلد مش ناقصة ................

العيش

العيش............. محدش فكر قبل كده الكلمه دى جت منين؟؟؟؟؟؟؟؟
فى الاول العيش ده المعنى الدارج للخبز
ولكن الناس سموه التسميه دى علشان يربطوه بعيشتهم
العيش بكسر العين هو العيش بفتح العين وتسكين الياء والشين
يعنى الحياة
اقل ما يمكن الحياة به هو رغيف العيش ازاى يتحول فى يوم من الايام هو اداة
انهاء الحياة الكلام ده طبعا ليا انا ولكل اللى زيى
مش للاخوه اللى احنا عارفينهم
من يومين فى التليفيزيون على قناه دريم على ما أظن كان فى لقاء
فى احدى البرامج مع وزير التضامن الاجتماعى
قولت
اسمع بيقول ايه .....
اسئله وردود دبلوماسية لحد ما اتسال عن ازمة رغيف العيش ......
قال والله احنا بنبزل
قصارى جهدنا لرفع مستوى خدمة تقديم رغيف العيش المصرى
بأعلى جودة وعلشان كده بنصرف اكتر .......
خلوا بالكم من بنصرف دى والمفروض اساسا انه مدعم وعلشان كده هيرتفع سعر رغيف العيش
من 5 قروش ل ؟؟؟؟ قرش وهيكون نصيب كل فرد 3 ونص فى اليوم
قفلت التليفزيون قبل ما اكسره وصممت انى انزل الفرنة تانى يوم واشوف الرغيف قبل ما يتم اللى قال عليه الوزير.....
نزلت فعلا فى الطابور وبدأت اتكلم مع الناس عن مشكلة رغيف العيش
ده بدون ما افتح موضوع الوزير وكانت الردود فى منتهى البساطة البساطة اللى كانت بتمثلى صدمة متوقعة
اللى يقولى انا عندى 7 اطفال واللى يقولى عنده 4 واللى معندوش
بس موضوع ال3ونص رغيف دول مينفعوش مع واحد صنايعى طول النهار فى الشارع عاوز ياكل ومش لوحده دول مينفعوش اى حد
ولو كنت قولتلهم ان الوزير قال كده كانوا هيضربونى افا
ولانى ليا وسطة ....الواد اللى بيلم الفلوس اعرفة
خدمنى وطلعلى القفص الاول ومشيت
وانا فى بالى ادخل اشوفهم بيعملوا العيش ده ازاى
وقفت ادردش معاه شوية ...... وصلنا لحته العجين
قالى انت فاكر اننا بنعجن بايدينا فى التشت بتاع الحاجة الوالده
لا احنا بنلبس اكياس فى رجلينا
وننزل على العجين لحد ما يبقى زى الفل
وبعدين نقطعة ونحطة فى الفرن
انت فاكر ايه ؟؟؟؟
انت فى مصر يا دكتور
انت فى مصر يا دكتور

منشية ......أم بيومى .........لا بنزيمة ؟؟؟؟؟؟؟؟؟

المكان شبرا الخيمة
الزمان اى وقت بعد الساعة (1) الظهر
صفة استحدثها الجنس البشرى
ليوصف بها أعضاء جمعية بنى البشر الا وهى الجشع
بحكم ان تخصص دراستى يستلزم منى المتابعة والحضور
فانا يوميا خلال رحلتى لكليتى
امر بمرحلتين
الاولانية ميكروباص
التانية المترو
نسيب المترو لبعدين ...
بس لازم نتكلم عن ظاهرة غريبة معرفش اذا كان فى حد فيكم عاشها لكن
بما انى من شبرا فانا بفكر اسيب الدراسة واشترى ميكروباص
بعد ما انزل من المترو متوجها الى الموقف لازم
اكون عامل حسابى على ساعة ساعة ونص
مستنى ميكروباص المسافة اللى هيقطعها
لا تتجاوز 10 او 12 دقيقة
لكن لانى مش قادر امشى لازم استنى فى الموقف
اقولكم انا هوصفلكم المشهد
ساحة كبيرة تتعدى مساحتها 200متر مربع
يعسكر فيها على الاقل 350 شخص
فى انتظار ميكروباص واحد
فجأه يظهر الميكروباص المنتظر على بعد 150 متر على الاقل
عاصفة من الهجوم البشرى على جسم الميكروباص
ولما تيجى تنادى على السواق تسأله رايح فين يبص لك بقرف
ويدور وشه للناحية التانية
دكتور يا اخواتى ؟؟؟؟؟؟؟
على امل التعلق باحدى جنبات الميكروباص
الميكروباص من جوه مخصص ل 11 راكب فقط
لكن لك ان تتخيل ان الميكروباص ده
بيشيل 29 راكب 4سواق
اقولكم ازاى؟
الميكروباص عبارة عن 4 مراحل
الاولى كرسى السواق +كرسى جنب السواق
التانيه كنبه ل3 اشخاص
التالتة كنبه ل 3 اشخاص
الرابعة كنبه خلفيه ل 4 اشخاص
لكن التفكير الاقتصادى بئه سمه من سمات الشعب المصرى فالبيه السواق عامل خشبة بالعرض
قدام كل كنبة يبقى اضرب العدد فى 2
و3 متشعبطين ورا و3 فوق العربيه و2 فى الكرسى اللى جنب السواق
طبعا مش محتاج اوصفلكم بنبقى عاملين ازاى جوه العربية
لكن انا مكنتش هتكلم عن كل ده البيه السواق
اكمالا للمنظومة الاقتصادية
بيعمل ايه؟؟؟؟
بيقسم السكة 3 محطات علشان يضرب الاجرة فى 3
من المؤسسة للبنزيمة نص جنيه
ومن البنزيمة للمنشية نص جنيه
ومن المنشية لام بيومى نص جنيه
والناس مفيش قدامها حل الا انها تدفع
ياريت تنزل شبرا علشان تعرف انك عايش فى مصر .......