الهلال والجمل ... الجردل والكنكة

ساعات قليلة جدا وتحسم معركة الانتخابات البرلمانية نهائيا ولمدة 5 سنوات من الراحة التامة لافراد الشعب المنتخبين

مع بداية موسم الانتخابات بتشوف فى مصر اللى مش ممكن تشوفه فى اى دولة فى العالم الا احنا طبعا,لافتات دعائية قماشية تكفى لكسوة نصف المشردين بدون كساء فى كل انحاء مصر,واموال تكفى لسد ديون البلد...لكن هنقول ايه...الانتخابات حرب والحرب كل حاجة فيها مشروعة ...

مع ان الحكومة حددت الحد الاقصى لمعدل الصرف للمرشحين فى حملات الدعاية بدوائرهم الانتخابية بأنه لا يتعدى 20000 جنيه مصرى الا ان المرشحين ضربوا بالقرار عرض الحائط

حيت تعدى معدل الصرف ال 3 مليون جنيه ,يعنى ال20000 دول ممكن بس يكونوا تمن السجاير اللى بتتوزع على الناخبين,

طبعا هتقولوا طب وليه الحكومة مش بتتكلم ؟؟؟؟؟

لا طبعا فى كمية من الشكاوى تتعدى 10000الاف شكوى فى مجلس الشعب ضد المرشحين لعدم التزامهم بالقرار ...لكن مجلس الشعب هيعمل ايه يعنى؟؟؟؟؟؟

هيلف يشوف ده وزع كام بطانية,ولا ده دبح كام عجل فى العيد,ولا ده وزع كام علبة سجاير ولا ايه ولا ايه ولا ايه؟؟؟؟؟؟؟؟؟؟؟

المشكلة مش فى مجلس الشعب ولا فى المرشحين

المشكلة فى اللى اتاح للمرشحين التصرف بالاسلوب ده

إللى إدى لعضو مجلس الشعب أو الشورى الشقة والعربيه والحضانة والمرتب العالى

ليه يتاح ليهم كل ده وهما أساسا مش محتاجين ؟

فى الأول والاخر دول ناس المفروض إنهم مننا

والمفروض إننا أختارناهم علشان يحلولنا مشاكلنا

ليه ميبقاش بنى ادم عادى زيه زى اللى هو بيحلله مشكلته ده مجازا يعنى إذا حل المشكلة؟!

إحنا محتاجين تغير فى القوانين علشان ميبقاش حد فعلا فوق القوانين

لوغيرنا قانون الضرايب إللى بينص على إن كل من زاد دخله عن 40,000 يدفع 20% ضرايب

يعنى اللى بياخد 40000 يدفع 20% واللى بياخد 2 مليون جنيه يدفع برضه 20%

لو اتغير القانون ده وبئة معدل الضرايب تصاعدى للمستثمرين ورجال الاعمال ... هيبقى فى فائض فى ميزانية الدولة بعد الفلوس الكتير اللى عمالة تترمى فى مشاريع مش بتكمل علشان نسد الديون اللى زى الهم على القلب

ومش هيبقى فى استفزاز فى معدل صرف المرشحين فى الدوائر الانتخابية .

لكن لو بصيت لعملية الانتخابات من بعد سياسى هتلاقى ان الانتخابات البرلمانية السنة دى مؤشر لمنعطف خطير فى تدهور احوال البلد السياسية

الحكومة رفضت الرقابة الدولية على الانتخاباتبحجة ان احنا عندنا المراقبة الوطنية ومنظمات الحقوق المدنية ، وبيقول الحزب الوطنى ان اسرائيل هى الممول الرئيسى للجنة المراقبة الدولية على الانتخابات ، وبالتالى فالهدف من ارسال اسرائيل للجنة المراقبة هى تشويه صورة الانتخابات المصرية والتشكيك فى نزاهتها ، ده على اساس انها نزيهة .

ولما تيجى تسأل الحزب الوطنى هل بتعتبر اسرائيل دولة عدوة ام دولة صديقة ؟ يكون الرد بأن اسرائيل دولة عدوة ، طبعا مع استمرار تصدير الغاز بأسعار تفضيلية لاسرائيل ، وساعتها بيكون الرد بأن الحكومة بتصدر الغاز لشركات اسرائيلية فى اسرائيل مش لاسرائيل !!!!!!!!!!

والسنة دى فى ظل الاستعداد لانتخابات الرئاسة كمان كام شهر كده هتكون الانتخابات البرلمانية السنة دى عبارة عن حرب بين الحزب الوطنى والاخوان المسلمين .

الحزب الوطنى بيراهن على الاعادة من خلال ترشيح 4 و 5 و 6 مرشحين فى نفس الدايرة الانتخابية علشان لو وقع واحد فى غيره 2 و 3 و 4 و 5 فى ظل استخدام الاخوان المسلمين لأساليب ملتوية فى الفات الانظار للأنتخابات .

من كام يوم قبل الانتخابات تم الحكم من قبل محكمة جنح الاسكندرية على 12 عضو من اعضاء جماعة الاخوان المسلمين والمرشحين للانتخابات البرلمانية بالسجن عامين لاستخدامهم شعارات دينية ضمن حملاتهم الدعائية والتى تم تجريمها منذ عام 2007 .

انتوا عارفين موقف الاخوان ده بيفكرنى بأيه ؟

انتوا عارفين لما يكون فى واحد مسجون وييجى الظابط علشان يرحله لحبس انفرادى او يديله علقة ... فيقوم السجين ده مطلع موس من تحت لسانه ويشرح نفسه ويصرخ ويقول الحقونى ... الظابط هيموتنى ... فيجرى الظابط من قدامه .

ده فعلا اللى هيعمله الاخوان المسلمين يوم الانتخابات ، هيلموا الفضائيات المشتاقة لتلك المناظر عند 3 او 4 دوائر انتخابية وهيقوموا بده ردا على رفض الحزب الوطنى لفرض الرقابة الدولية على الانتخابات البرلمانية .

بس بصراحة فى نماذج من القادة لجماعة الاخوان المسلمين زى الدكتور محمد البلتاجى بيقوموا بمسيرات سلمية فى قمة الاحترام والالتزام .

وانا عاوز اقولهم كلمة ... انتوا عارفين ان الممول الرئيسى للجنة المراقبة الدولية هو اسرائيل فعلا ... افرضوا انهم جم وشافوا ان الانتخابات بتاعتنا مزورة فعلا ... وكتبوا التقرير ... وقبل ما يرفعوه لمنظمة حقوق الانسان صدر قرار بمضاعفة الغاز المصدر لأسرائيل وبنفس السعر الاصلى ... هل يا ترى هيرفعوا التقرير فعلا ؟؟؟؟؟؟!!!!!!!!!!!!! طبعا لأ !!!!!!!!

الحكومة بتبنى دلوقتى سجن على مساحة 45 فدان فى جمصة ... بتبنيه لمين ... الحدق يفهم بئة ؟؟؟؟؟!!!!!!!

يبقى فى الاخر احنا محتاجين وحدة وطنية حقيقية لمستقبل البلد دى ... علشانا احنا ... مش علشانهم هما ... لان احنا المستقبل واحنا خير البلد دى ...............!!!!!!!!!!

الى عضوات جمعية الجنس اللطيف

من ايام بسيطة ودعنا عيد الاضحى المبارك ... ربنا يعيده علينا بخير وسلامة

بس انا مش بتكلم عن العيد ... أنا بتكلم عن اللى بيحصل اثناء العيد ... او مش شرط العيد ... اللى بيحصل اثناء الاحتفال بأى مناسبة عامة او عيد قومى من الكتير اوى اللى بنحتفل بيهم فى مصر

كلامى النهارده موجه للأخوات عضوات جمعية الجنس اللطيف

اثناء الاحتفال باى مناسبة ... واوول لما تخرج للشارع ... تلاقى غالبا مناظر بئت متوقعة ...

الواحدة من دول ضاربة فى وشها كام لون كده تخليك تخاف تبصلها اصلا ...

لا والغريب انهم فاكرين بكده انهم حلوين ... ابدا والله يمكن شكلهم من غير المكياج المرعب ده بيبقى اجمل بكتير ...

بس ده ناتج عن عدم الايمان عند 90% من بنات الجيل الحالى انهم حلوين

وانها فى الاول والاخر بنت ... وهييجى يوم تتشاف فيه على حقيقتها ... لكن للأسف ده اللى بيحصل

لكن هما معتقدين انهم بالمنظر ده بيبقوا اكثر جمالا وبالتالى لازم يعملوا كده يمكن يلحقوا القطر قبل ما يفوتهم !!!!!!!!!

تلاقى البنت ملونة جفونها بأخضر او بنفسجى ... وتحت عينيها بسيلفر او بنفسجى برضه وتلاقى امتار من الرموش مش عارف بيعملوها ازاى دى بصراحة ... وخدودها بأحمر هادى شوية ... وشفايفها بأحمر فاقع جدا ...

ده مذهب من المذاهب ... وبتتعدد المذاهب دى على حسب غادة عادل عملت ايه ؟ ... او نانسى لونت شعرها ازاى ؟ ... او ممكن على حسب زوء اللى بتحط الميكب او المكياج ... عافاك الله !!!!!

وتلاقى 70% من ال90% من البنات اللى بتتمثل بالمظهر ده

لابسين بادى ضيق جدا ... وبنطلون أضيق بكتير جداااااااااا حاجة كده 3d ...

مع وجود تاتوز فى بعض المناطق على واليدين والخدود والكتفين والرقبة

وعلى كل اللى فات ده

تلاقيهم لابسين حجاب مكون من 3 طرح كحد أدنى ... طبعا مختلفة الالوان على حسب المناسبة

انا فاكر كويس اوى ... ايام ماتش مصر والجزاير ... كنت الاقى البنات كلهم لابسين 3 طرح بعدد الوان علم مصر

ده مقبول نسبيا بالمقارنة بميكس الالوان اللى بيحصل فى الاحتفال بأى مناسبة تانية من حيث انه راحة للعين ...

فى سؤال بئة ... ملح عليا أنا شخصيا

سيبك من الطرح والواناها ... لابسة الحجاب على الجينز ليه ... أنا مش عارف ... !!!!!

لا واذا اسعدك الحظ وعدت من جنبك البنت دى ... هتشم ميكس من برفانات مشميتهاش قبل كده ولا عمرك هتشمها بعد كده

ولو اتكلمت معاها اول كلمة بعد التعارف ... لما تسألها هتعملى ايه دلوقتى ؟ تقولك مش عارف وقيس على ده كل الكلام

انا مش ضد الجمال ... ولا ضد ان الواحدة او الشخص عموما يحاول يخلى نفسه أجمل

انا ضد الاستفزاز فى اللبس والكلام والتصرفات والحركات

كل حاجة حلوة فى المعقول ... بس الشىء لما بيزيد عن حده بيتقلب لضده

فى الاخر ... رجاء من شاب طهقان ... ارحمونا شوية ...

بلاش البنفسجى والاحمر والاصفر والليمونى والفوشيكا والاخرق يدخلوا ضمن طقم واحد

وبلاش البرفانت اللى تزكم دى

وفى ته مربوطة بتتحط فى اخر الكلمة بالنسبة لكم

وكمان بلاش الطرحة مع الجينز الضيق خصوصا لو لونه تلجى

لان لو اسمريتوا بالمنظر ده مش هيبقى فى الا حل من اتنين ...

يا تقلعوا الطرح ... يا تقلعوا الجينز !!!!!!!!!!!!!!!!!!!!

كرتون رائع عن الإنتخابات المصريه .. خد على قفاك

8 أسباب للتعاقد مع شيكابالا

واحد زملكاوى : شفت يا عم عملنا ايه فى المصرى امبارح

شوفت شيكابالا

وانتوا خسرتوا من الاسماعيلى 3

تلاااااااااااااتة

واحد اهلاوى صاحبه : اه شفت الماتش مبروك يا عمونا بقيتوا الاول فى الدورى دلوقتى 24 نقطة

الزملكاوى : اه الاول طبعا غصب عن اى حد

الاهلاوى : براحة على نفسك شوية يا عم

بس هقولك ايه

انتوا فرحانين فرحة الاهبل بما انكم متعرفوش يعنى الاول من 7 سنين

ده انتوا لو فى كلية الطب كنتوا اتخرجتوا

يعنى انت خلصت ثانوية ودخلت كلية التجارة وخلصت ومشفتوش الدورى

حقكم بصراحة تفرحوا بئة

الزملكاوى : اه طبعا هنفرح وهنغلبكم كمان فى الماتش اللى جاى

هنوريكم شيكابالا هيعمل فيكم ايه ؟

الاهلاوى : يا عم اسكت بس

مش شيكابالا ده اللى عمل نفسه عيان ومرضيش يروح المنتخب

ولعب مع الفرقة ال96 دقيقة

بتوع النادى المصرى لو بيفهموا

يقدموا احتجاج لاتحاد الكورة يخصموا منكم التلات نقط ويحسبوهم ليهم هما حسب قانون الفيفا

الزملكاوى : بس ياد

انتوا بتحقدوا علينا علشان احنا احسن منكم وعندنا لاعب احسن من الفرقة بتاعتكم كلها

الاهلاوى : انتوا عندكوا لاعب بجد والله

يا عم اسكت بس

يابنى احنا فى مئويتنا جبنا برشلونة

وانتوا فى مئويتكم بتقولوا سلفونا

لأ وعاملين خط ساخن للتبرعات

اسكت يا عم

بتلموله فلوس علشان يلعب

الزملكاوى : اه طبعا

شيكابالا برقبة الفرقة بتاعتكم كلها ... عارفه

الاهلاوى : اااااااااه شيكابالا

اسمه محمود عبد الرازق

سنه من مواليد 5 مارس 1986يعنى عنده بتاع 24 سنة

لقبه شى .. شى .. شيكابالا

مهنته لاعب كرة بنادى الزمالك لم يحرز اى بطولة محلية فى حياته ولا بطولة افريقية ولا بطولة دولية فى ماعدا بطولة كأس افريقيا بأنجولا عام 2010 البطوبة التى لم يشارك فيها الا ب28 دقيقة بس

لا معرفوش !!!!!!!!!!!!

الزملكاوى : حمرا ياد

الاهلاوى : ياااااااااااه ... هى انتوا بتناموا تحلموا بيها ؟؟

الزملكاوى : هى ايه دى

الاهلاوى : الفانلة بتاعتنا يا عم ... انت فكرك راح لفين ؟؟؟ أنا غرضى شريف

الزملكاوى : والله لنقطعكم الماتش الجاى انتوا اصلا بتحقدوا علينا والله

الاهلاوى : ليه ... علشان عندكم خطين حمر ؟؟؟!!!

الزملكاوى : اتريق براحتك ... بكرة هنوريكوا اللى عمركم ما شفتوه

الاهلاوى : احنا رجالة .. مبنشوفش الحاجات دى

الزملكاوى : هو ايه ده ؟؟؟

الاهلاوى : الماتش يا عم ... انت فكرك راح لفين ؟ انا غرضى شريف

الزملكاوى : اه الماتش ... ده حسام حسن هيخليكوا تلفوا حوالين نفسكوا

ياه لو هو وشيكابالا يمضولنا عقد مدى الحياة

الاهلاوى : انا لو منكم فعلا امضى مع شيكابالا على طول

الزملكاوى : ليه بئة

الاهلاوى : بسخرية (الجهل اشتغل بئة) أقولك يا عم

فى 8 أسباب للتعاقد مع شيكابالا:

يعنى بصراحة متعدد الاستخدامات

يعنى ممكن تحطه فى اى حتة هيشتغل برضه

الزملكاوى : هو مين ده ؟

الاهلاوى : شيكابالا يا عم ... انت فكرك راح لفين ؟؟؟ أنا غرضى شريف

السبب الاول

بيعرف يلم الكورة صح

عمره ما بيضيع كورة

يعنى عمرك ما تحدفله كورة بره الملعب وميلاقيهاش

وممكن يشتغلك فى الملعب اوفرتايم كمان

السبب التانى

بلطجى جامد اخر حاجة

يعنى ممكن يشتغل بودى جارد

السبب التالت

بيلمع جزم كويس جدا

شوف جزمته بتلمع ازاى

السبب الرابع

بتاع نسوان وهيظبطكم

يعنى دايس شارع الهرم وشارع شهاب وجامعة الدول وابو رغوة كمان

وده السبب الاهم

هيظبطك فى اى مصلحة

السبب الخامس

بيحيي افراح كمان

اه وربنا ... يعنى لو عندك فرح فى النادى

او اى لاعب واتزنق فى مطرب

ناديله هو هيقوم بالواجب

الزملكاوى : واجب ايه ؟

الاهلاوى : هيغنى يعنى يا عم ... انت فكرك راح لفين ؟؟؟ أنا غرضى شريف

السبب السادس

سواق لانشات جامد اوى

يعنى لو حبيت تطلع رحلة انت والمدام

هيكون فى الخدمة

ايه انت مجربتوش قبل كده ؟

الزملكاوى : هو ايه ده ؟

الاهلاوى : على فكرة انت انسان مستفز ومصطنع وغير محترم بالمرة

على طول فكرك يروح لحاجات كده ... مش ولابد

انا اقصد شيكابالا يا عم

انت عارفنى يا عم

اغراضى كلها شريفة

السبب السابع

بيجيب هدوم جامدة اوى من عند ابو نسمة

يعنى هيعرف يورد لكم فانلات

بدل اللى عمالين تخترعوا فى امها دى ومش عارفين تشيلوا الخطين الحمر برضه

الزملكاوى : هى ايه دى ؟

الاهلاوى : الفانلة بتاعتكم يا عم ... انت فكرك راح لفين ؟؟؟ انا غرضى شريف

السبب التامن

مكن يشتغل رقاصة

اهوه يشتغل بلقمته

لا وبيقول الفاظ سافلة كمان من اللى بتعجب الجمهور بتاعكم

يا عم الحمد لله انى اهلاوى

مكتوب عالجبين بالدم ناس تمشى شايلة الهم محرومة من الافراح

منعرفش غير الاخلاق والادب والاحترام

خليهولوكوا

بس فرحونا بئة وخدوه

الزملكاوى : هو ايه ده

الاهلاوى : الدورى يا عم ... انت فكرك راح لفين ؟؟؟ أنا غرضى شريف !!!!!!!!!!!!!!!!!!!!!!!