علشان التلاتة جنيه

كل ما شعرى يطول
نفس الكلمتين بتوع كل مرة
" يابنى روح احلق ..... شعرك طويل ..... ولا هتربيه زى البنات "
" يا حاج النبى كان مطول شعره "
وفى الاخر بنفذ اللى فى دماغى وبروح احلق
روحت عند محمود الحلاق وفضلت قاعد مستنيه
الولد اللى شغال عنده راح يناديله مرة واتنين وتلاتة
قعدت نص ساعة
لا ياربى ساعةتقريبا
والباشا لسه مشرفش
بعد شوية جه
"ازيك يا حمادة يا عسل "
" ازيك يا محمود "
" انت قاعد بقالك كتير "
" ساعة تقريبا "
راح فجأة ضارب الواد بالقلم على وشه
وقايله " مجيتش تنادينى ليه ؟"
وطبعا الواد مبيتكلمش
طبعا انا زهلت
الواد راحله مرة واتنين وتلاتة
بس هو بيرمى غلطه على الولد
المهم
وهو بيخلقلى
راح برضه فجأة وبدون اسباب ضرب الولد على وشه تانى
والولد برضه مبيتكلمش
قولتله "ليه كده يا محمود ؟ "
قالى " مش عارف ..... بس حاسس انى عاوز اضربه "
قولتله " وعلى كده بتديله كام ؟"
قالى " 10 جنيه فى اليوم "
خلصت وماشى
كانت الساعة حوالى 1 بعد نص الليل
وهو برضه بيقفل المحل وماشى
والواد بيمسح المحل ومروح
بالصدفة كان الولد مروح من طريقى
قولتله " اسمك ايه ؟ "
قالى " اسلام "
قولتله " فى سنة كام يا اسلام ؟"
قالى " انا مش فى مدرسة "
قولتله " اه ... مدخلتش مدرسة اصلا "
قالى " لا ... طلعت من تانية اعدادى "
قولتله " طيب ليه مش كنت بتذاكر يا اسلام ؟"
قالى " والله كنت بذاكر بس الاستاذ كان عاوز يدينى درس بالعافية
ابويا مش معاه فلوس ... والاستاذ عمال يقولى هسأطك
ابويا ريح دماغه ... وقعدنى من المدرسة ... وجيت اشتغل هنا "
قولتله " بس مش شايف انك صغير على الشغل ده يا اسلام ؟"
بما انى لما كنت فى سنه عمرى ما فكرت اشتغل ولا حتى فى الاجازات
كان كل تفكيرى فى البلايستيشن ... العجلة ... العب كورة فى الاهلى ... الخروج ... الايس كريم ...
قالى " ابويا اللى مشغلنى بالعافية والله ... وفى الاخر بياخد الفلوس "
قولتله " بتاخد كام بئة ؟"
قالى " 3 جنيه فى اليوم "
قولتله "بتشتغل من الساعة كام ؟"
قالى " من 9 الصبح ل12 او 1 بليل "
بعدها مقدرتش اتكلم
علشان 3 جنيه يستحمل كل الاهانة والضرب ده كله
بس سألت نفسى سؤال
" مين اللى هيتحمل ذنب اسلام ؟ "
الاستاذ اللى اجبره على الدرس؟
ولا ابوه اللى اجبره على الشغل؟
ولا محمود اللى اجبره على تحمل الاهانة ؟