شيلاه يا حاج ابو توتو

كنت بصلى الجمعة امبارح
وبعد الصلاة وقف امام المسجد وقال :
( أرجوكم ان تستمعوا الى ولا تغادروا المسجد )
طبعا كلنا وقفنا مخرجناش
يعنى اتفضل اتكلم
قالنا :
( لقد توفى الى رحمة الله تعالى فجر اليوم
الحاج ابو توتو ............................
صاحب مطعم الحرية للمأكولات الشرقية
وصاحب صيدلية الانسانية الضخمة
وصاحب مستشفى الامل التخصصى
وصاحب دار ايتام الرحمة
وصاحب هذا المسجد
ووالد كل من الاستاذ توتو
المحامى بالأستئناف ومجلس الدولة
والطبيبة زوزو
اخصائية الاطفال بمستشفيات القوات المسلحة
والاستاذ جوجو
مدير عام العلاقات العامة بالمجلس الحربى
وسيادة اللواء
دودو اللواء بالجيش
واخو كل من ................................
وابن عم كل من ...........................
وابن الحاج .......... صاحب ............. واخو ............
بدعوكم لصلاة الجنازة على اخيكم الفقيد )
بغض النظر عن اللى احنا عمالين نسمعة بقالنا نص ساعة
قولت هصلى
انا مش بصلى ليه
انا بصلى لربنا
ياد اعمل الخير وارميه للبحر
وقفنا خلاص علشان نصلى
الامام قال :
( توجهوا الى القبلة للصلاة على اخيكم ومعانا متوفى اخر )
وعلشان محدش يلحق يسأله مين المتوفى التانى
راح داخل فى الصلاة على طول ( الله اكبر )
طبعا كلنا صلينا وراه
وبعد ما الصلاة خلصت
خلاص هنمشى
قالنا :
( استنوا ............ نسيت ابلغكم ان الدفنة دلوقتى
فى حوش كبار الاموات بالبساتين..................
والعزاء بنادى الضباط ............
فى حضور كل من
السيد المحافظ
والسيد رئيس الحى
والسيد نائب الدايرة بمجلس الشعب
والسيد نائب مجلس الشورى
واللواء ............ و ................
وهنبنيله مقام هنا للزيارة وقراءة الفاتحة )
قولت والله لأستناه بره الامام ده
وفعلا وقفت استنيته
لقيته خارج بيعيط وزعلان ومتأثر اوى
قولتله مالك يا عم الشيخ
قالى كان حبيبى وهو بيشاور على الخشبة
قصدى على السيراميكا اللى متشال فيها الحاج ابو توتو
قولتله انت تعرفه ؟
قالى عز المعرفة
قولتله كنت بتعد معاه يعنى وكده
تعرفه معرفة شخصية ؟
حس انى انا اعرفه ولو كدب عليا هفقسه
قالى لأ
بس كنت بسمع عنه انه راجل صالح
اللهم اسكنه فسيح جناتك ... اللهم ..........................
قولتله طب انت مقولتليش مين المتوفى التانى
قالى ده السواق بتاعه
عم صالح اللى ساكن فى اخر الشارع
اصلهم هما الاتنين ماتوا فى حادثة العربية
قولتله طيب ليه كل اللى انت قولته جوه ده ؟
قالى مش صاحب المسجد
يخرج الخرجة اللى على مزاجه
قولتله طيب والراجل التانى ؟
ماهو كده محدش هييجى يعزى
قالى كفاية انه خرج فى نفس الصلاة اللى خرج فيها الحاج ابو توتو
اهل ابو توتو ناس واصلين
لازم نبسطهم
اما عم صالح على أد حاله ......................
انا خدت منه الكلمتين وهزيتله دماغى وادورت علشان امشى
سمعت صوته تانى بيعيط ولا أجدعها ست
روح الله يرحمك
روحت مدور علشان اكمل فى طريقى
طيب هو لما قال فلان وفلان وفلان
ده هيمنع عنه الحساب
الفلوس اللى جمعها هتغنىه عن الجنة
ولاده حد هيشيل عنه ذنوبه
حتى فى الموت فى بلدنا الناس خلاص بئت طبقات
للأسف الناس فاكرة ان
الوزير هيتحاسب على أنه وزير
والسواق الملايكة هتدخل تقوله يا عم صالح
قولت ربنا يخرجنى منها على خير
عم صالح . عم صالح وأيه يعنى
بس أدخل الجنة
وعجبى .......................................