دمكم مش رخيص يا ولاد بلدى ♥

بعد الاحداث المؤسفة اللى حصلت فى اسكندرية ... ولو نزلت الشارع دلوقتى

هتلاقى حالة من التكاتف والوحدة مكانتش موجودة قبل كده ده بجانب حالة من الاتزان الغير مسبوق فى الاقوال والافعال هتلاقيها منتشرة بين الناس كلها

طبعا محدش مبسوط من اللى حصل ... بس برضه محدش مش مبسوط من اللى موجود دلوقتى

اولا ... احنا عمرنا ما اتربينا على انا مسلم وانت مسيحى ... ولا عمرنا كنا بنفكر فى الموضوع ده او نفتكره

ولا كنا عمرنا بنتفصل عن بعض اللهم الا لما كانت بتيجى حصة الدين

لأننا نسيج مجتمع واحد ... مجتمع عاش واتربى على الخير ... ما اترباش على العنصرية ولا عرف ثقافة المقاطعة الدينية ولا عمره عرف الحاجات اللى بنسمع عنها بره من اضطهاد و تعذيب وما الى ذلك ...

الكلام ده كلنا عارفينه ... وكلنا عارفين اننا اخوات ... وطبعا بنحب بعض ... لكن كنا محتاجين حاجة زى اللى حصلت فى اسكندرية علشان تفكرنا ...

وبرضه كنا محتاجين حادثة زى دى علشان تنبهنا اننا مستهدفين ومن شتى الجوانب

اللى بيلعب على الموضوع ده بيتبع سياسة فرق تسد

بس المفروض اننا نقف فى وش اللى عاوز يعمل كده سواء كان من جوه ولا من بره

المفروض اننا منسيبش مساحة للتدخل فى شئونا

ايا كانت الجهة اللى بتحاول تحط رجل جوه البلد

النهارده منظمات حقوق الانسان عاوزة تعمل تحقيق فى اللى حصل جوه مصر

بحجة ان فى اضطهاد دينى للمسيحيين جوه مصر

طب ما هم سايبين مسيحي فلسطين بيتبهدلوا كل يوم

وعلى مراى ومسمع من كل العالم

ومبيتكلموش يعنى

دى كلها تلاكيك علشان الناس دى تحط رجلها جوه بلدنا

ومنظمات تانيه عاوزة تعمل حمايات على الاقباط فى مصر

وهتلاقى من ده كتير

المفروض ان اخواتنا المسيحيين هما اللى يرفضوا ده

لأننا فى الاول والاخر كلنا مصريين

وانا واثق من الرد لأننا اتربينا على العزة والكرامة

واللى حصل ده لا يسر لا مسيحى ولا مسلم

محدش يقبل بكده ابدا

ناس ابرياء مدنيين مالهمش ذنب فى اى حاجة

مسلمين ومسحيين ....

ولكن اخشى ما اخشاه

ان اللى فيه البلد دلوقتى

واللى فيه الشعب دلوقتى مسلم ومسيحى

يكون مؤقت .............

يعنى يكون حاجة كده زى بطولة افريقيا وتعدى

الايام اللى جاية متستحملش نوبة سهو تانية

ومينفعش حد يوقع بينا تانى

وبرضه الحكومة لازم تلاقى حل لارضاء اخواتنا المسيحيين

بالحكم فى القضايا القديمة علشان يبقى الجانى عبرة لمن يعتبر

واحب اوضح لاخواتى ان اللى عمل كده ده الاسلام برىء منه

لأن ابشع حاجة انك تقتل حد وهو فى بيت ربنا .. وهو بيصلى

وفى الاخر بعزى اخواتى الاقباط تانى ... وبقولهم :

دمكم مش رخيص يا ولاد بلدى ♥♥♥♥♥♥♥♥♥♥