ثورة 25 يناير 2011 ... الحلقة الثانية ( اثبتوا )

حسب توقعاتى لن يسقط النظام المصرى ...... ولكن ........!!!!!!!!!!!!!

دلوقتى لما يمشى مبارك هيترك فراغ سياسى فظيع وهيحط البلد على المحك للتدخلات الخارجية وانتهاك حقوق وثروات البلد ... وتعريضها للتخريب من قبل كل جهة لها عين على مصر

المهم فى اللى جاى ... التكالب على مقعد الرئاسة هيبدأ من لحظة خروج مبارك من قصر الرئاسة

فى نوعين محبش انهم يكونوا موجودين علشان ميتكررش اللى احنا فيه دلوقتى ...

النوع الاول من المرشحين .. شخص كان طول عمره بيحلم بالجلوس على عرش الرئاسة ... غالبا مش علشان المواطنين ولا الغلابة ولا الكلام الحمصى ده ... انما تحقيقا لبعض الاهواء الشخصية ... وزى ما ورد فى السنة المحمدية ... فيما معناه ان من سعى للسلطة او اتته عن مسألة لم يعنه الله عليها

وده على سبيل المثال زى أيمن نور

والنوع التانى من المرشحين ... نوع كان طول عمره بره البلد ... ميعرفش حاجة عن ناسها ولا مشاكلهم ... نوع يحب يظهر فى الصورة لما تكون فى صورة ... لكن عمره ما يقدر يخلق صورة ... والنوع ده لا يصلح للقيادة

زى محمد البرادعى مثلا

احنا عاوزين حد مننا ... انسان صاحب فكر ... فكر متجدد ... علشان يقود البلد لبر الامان

قبل كده كان رأيى فى ظل وجود مبارك اننا نغير كام مادة فى الدستور ونبقى على الرئيس ... لكن بعد الثورة والغضب العام من افراد الشعب على مبارك ... لن يكون هناك اصلاح الا بالرحيل ... ولكن ليس الرحيل الفورى ... ثم الاختيار المناسب الحر النزيه

مفيش حاجة من اللى بنعملها مالهاش لزمة ... الحرية غالية

28 – 1 – 2011