أنا حقا أعترض !!!!!

مش هعتبره خروج عن النص ... لأن الخروج عن النص بيطبق على كل ما ندر سماعه او قوله او فعله من افعال او اقوال لأن الناس بتعتبره عيب ....

فى مجتمعنا اللطيف ظهر تعبير لطيف للأعتراض بئه متعارف ومتداول بين الشبابا والشابات ، الكبار والصغار ، والفضل لرائد التعبير

( أحمد مكى ) لما قالها فى فيلم ( اتش دبور ) ( ايه سفن ايه - A7A )

بعد أيام من عرض الفيلم بئت ( A7A ) كلفظ حاجة عادية بين الشباب والشابات خصوصا الشباب لأتساع مجال المداعبات بينهم الى حد يمكن فيه التلفظ وبكل سهولة بكلمة بسيطة زى دى .....

وبالوقت بئت كلمة عادية للولاد قدام البنات والعكس ، ولو مش مصدقنى افتح الفيس بوك .....

وبمناسبة الفيس بوك ... انا فاكر ان واحد صاحبى قال مرة ان ( A7A ) لسه قبيحة برضه مش علشان اتقالت فى فيلم او انها بتتقال بالفرانكو بئت حاجة سبور ، ممكن اللى كان بيمثل أنه مش بيتلفظ بالالفاظ دى يقولها عادى ، ووجه كلامه بشكل خاص للبنات لما لقى استخدام اللفظ زاد بين البنات حبتين .....

بصراحة قرأت رد غريب من بنت أنا معرفهاش شخصيا ... لكن الرد كان غريب فى منطقه ... وكان سبب لكتابتى المقال ده ...

كانت بتقوله : احنا معاكم فى الكلية وفى الشارع وفى كل مكان وبنسمعكم بتقولوا كده طول النهار .. ومش عاوزنا نتأثر بيكم ؟؟!!!!

الرد خلانى أبص للموقف بصورة تانية ... هو ان 99% من افراد مجتمعنا مش بيرفضوا الغلط ولكن بيرفضوا الصورة او الطريقة اللى بيتقال او بيتعمل بيها الغلط ده ...

يعنى ( A7A ) دى هى هى ( أ - ح - ا ) واللى بيقولها عارف كده كويس ... لكن بما ان الناس كلها بتقولها يبقى دى بئت حاجة عادية !!!!!

انا مش ضد فيلم احمد مكى على فكرة .. ، ولا ضد ( A7A ) ولا عمرى هكون ضدها !!!!!!!!!!!

المصطلح ده اختصار لثلاث كلمات هم ( أنا حقا أعترض ) ، يعنى الكلمة فى الاساس مش عيب ، ولكن لأن الناس فى مجتمعنا اتعودوا على السكوت ، وان حق الاعتراض بئه حاجة عيب انك تعملها او تفكر فيها ، بئت ( A7A ) عيب تتقال ،

ولكن مع أول فرصة لقولها لما بئت تتقال بالفرانكو ، الناس رفضت التفكير فى عدم ترديد الكلمة ...!!

ظهر فى الفترة الاخيرة موقع او منتدى عربى اسمه ( A7A )

انا شخصيا من أشد المعجبين بيه ... وبعتبر نفسى واحد من أشد المشجعين للمصطلح للتعبير عن الغضب او ابداء الاعتراض او رفض موقف او سلوك معين ... ، لأنه ساعات كتير بيعبر عن شعور قوى بالغضب و الرفض والاستهجان بتفشل كلمات كتير اوى فى التعبير عنه ...

وشايف انه خطوة كويسة فى مجتمع اصبح أضعف الايمان فيه ( A7A ) .