المصيبة انا انسان

فتحنا عينيا عالدنيا قالوا دى بلدنا

بلد ابوك وامك وبلد اجدادنا

قولت وانا مالى مخترتش تكون بلدى

قالى ابويا مقدر ومكتوب يا ولدى

دخلنا مدارسها وفى الطابور واقفين

نحيي علمها ليه محناش عارفين ؟؟؟؟

معلومناش فى المدارس يعنى ايه كلمة بلد

علمونا من العصاية نخاف ونجرى وننفرط

ولما كبرت وعرفت يعنى ايه كلمة بلد

معجبنيش حالها ... كان نفسى اشوفها كويسة

ضحكوا عليا وقالوا على عقلى شرد

ضحكوا وضحكت وضحكوا من تانى وقولت

اذا كانت القماشة اللى معلقينها على سارى

اذا سمعت تحية العلم لفرحتها متقدرش تدارى

وانا لحم ودم مش حيوان ... انا انسان ... المصيبة انا انسان

عندى قلب ... عندى شعور ... عندى احساس ... وكمان عندى لسان

من غيره مقدرش اعيش ... لما افتح الجرنال واقرأ ازمة طابور العيش

مقدرش اكبر دماغى او اعيش فى غيبوبة

وانا اهل بلدى بيقطعوا بعض عشان انبوبة

بتصعب عليا نفسى لما اسمع كلام مسئول ...

بيمدح فى هيفا ونانسى وسايب الناس غرقانين فى السيول

انا مواطن معصور

مش بفتح التليفزيون اتفرج على جلسات المجلس المسرور

ولا يهمنى لا البرادعى ولا ايمن نور

ولا فى يوم دورت على اللى حصل ما بين شوبير ومرتضى منصور

ولا حتى فى يوم هيأكلنى تعديل الدستور

انا واحد من الكتير اللى ساكنين فى القبور

انا الوبا ... اللى بيخاف الغنى اعدى من قدام عريبته لأوسخها

اقولك ... انا انفلونزا الطيور

وانا اللى قطعت النور

انا اللى صدرت الغاز وعملت ازمة البوتاجاز

انا قطر الصعيد

وانا محتكر الحديد

انا ايه ولا ايه ولا ايه ؟

انا مواطن بيعانى من زحمة المواصلات

بعانى من النفس اللى مش قادر اخده جوه العشوائيات

انا مواطن حر ... نفسى ادوق طعم الانتخابات

نفسى انسى فتاوى الفضائيات

نفسى انسى مشاكل التعليم

ميهمنيش لا هشام طلعت ولا سوزان تميم

انا مواطن بسيط نفسى اعيش

نفسى لتعشى حتة جبنة قريش ... وجنبها حتة خيار

مش بحسد ابو الاربعين مليار

مش بالجنيه المعفن ... لا بالدولار

نفسى اغمض عينى وافتحها من جديد

ملاقيش لا معارضة ولا احزاب

ولا الاقى فى بلدى مشكلة عالنقاب

ملاقيش اللى حلل ارضاع الكبير

ولا اللى حلا شرب بول البعير

ملاقيش انفلونزا الخنازير

ولا الاقى اهلى عايشين وسط الصراصير

غمضت عينى وفتحتها

لقيت كيلو اللحمة بئة ب80

ولقيتنا فى الزبالة غرقانين

لقيتنا فى ازهى عصور الديمقراطية

بندفع غصب ضريبة عقارية

قولت ياريتنى ما غمضت

ولا ياريتنى ما فتحت

شكلى معرفتش يعنى ايه كلمة بلد

وكان عندهم حق لما ضحكوا عليا وقالوا على عقلى شرد

اصلى لحم ودم ... مش حيوان

المصيبة انما انســـــــــــــــــــــــــــــــــــــــــــــــــــــــان

الفرق بين مصر واوروبا

الزوجة التانية

مش فيلم سعاد حسنى ولكن استفسار وتوضيح لحاجة
بنشوفها على طول اذا مكناش عيشناها
ولمسناها على ارض الواقع ..........
انا مش هتكلم عن ايه اللى يخلى الراجل يتجوز؟؟؟؟؟؟؟؟؟
ولا عن اللى حدده الشرع ؟؟؟؟؟؟؟؟
ولبا عن انه المفروض يبلغ مراته الاولانيه ؟؟؟؟؟
لكن هنتكلم عن العلاقة بين الزوجتين
الاولى والتانية ...........
على طول بنشوف العلاقة بين الضراير (علاقه ندية)
وعندهم حق مع ان البدايه بتكون من الزوجة الاولى
بتشوف ان التانيه خطفت منها جوزهاوابو عيالها .........
وتبقى التانية فى نظرها خطافة رجالة وخرابة بيوت وما الى ذلك من صفات تلتصق بالزوجة الثانية فى مجتمعنا او فى اى مجتمع
ولو بتحب جوزها اوى تقول هى اللى لفت عليه وغوته
ولو مش بتحبه تقول عينيه زايغة
ومش بترجع الاسباب لنقص هى عيشت فيه جوزها
المهم ........
فى معظم الاحيان بتكون الزوجة الثانية بنت عادية او ست محتلامة
اتقدملها العريس المتجوز
ولأن فى بطالة = مفيش شغل = مفيش فلوس + زيادة الطلبات + ارتفاع نسبة الاناث بالمقارنة بالذكور اللى هى 9 : 1 = مفيش جواز = ارتفاع نسبة العنوسة فى البلد

بتضطر توافق ......
يعنى هى كانت قاعدة فى بيت اهلها وعريس اتقدملها ..........
وافق على شروطها وعلى شروط اهلها
وافقت تتجوزه
يبقى ليه المعاملة دى !!!!!!!!!!!!!

السبب هو حب التملك عند المراة
مش هقول طمع
لكن هو حب تملك وسيطرة
لغريزة من غرائز المرأة عموما .....
طبعا ده مش حكم ذكورى عنصرى لكن هى بتعكس التصرفات بين الزوجتين المشتركتان فى زوج واحد ......
بتشوف ان التانية اخدت منها حاجة ملكها او جزء منها مع انها ممكن تكون مش بتشوفه الا كل كام شهر ....
ولكن بمجرد ما تعرف انه اتجوز نار السيطرة مش الغيرة بتشتعل ...
مع عدم التعميم .. فى ناس لسه بتحب بجد

لكن فى كل الاحوال .... للأسف ... هى حواء ... نصف المجتمع ..............................................

0900 يا ترى مين خليفة (كرومبو)؟؟؟؟

كلنا شفنا فى رمضان اللى فات وقبل رمضان كمان وبنشوف لحد دلوقتى المفتش كرومبو....كانت حلقاته قبل رمضان أسبوعية لكنها بقت يومية فى رمضان
مانكرش ان حلقات المفتش كرومبو كانت مسليه
مع انها كانت بتتطرق للتفاهة فى بعض الاحيان لكنها كانت لذيذة فى معظم الاحيان .......
المهم انه فى الاخر مش عباره عن مسلسل او حلقات ترفيهة للاطفال اد ما كانت سلعة تجارية لجنى الاموال والتلاعب بعقول المصريين كبارا وصغارا
المغزى مكانش فى فكرة الحلقة او فى الافيهات اللى بتترمى بين ابطال الحلقة لكن المغزى فى كيفية استفزاز المشاهد....
استفزازه بأن المسابقة بسيطة وسهلة مما يدفع المشاهد الى التفكير واليقين بأنها فى متناول يده وانه يقدر يجنى ثمرة فى المكافأة وهو قاعد قدام التليفزيون....
بدون تعب او جهد....
واللى بدوره بيدى احساس بانى ممكن احقق الثروة بدون مجهود....
=زيادة البطالة يعنى مفيش شغل واللى شغالين مش عاوزين يشتغلوا
وده بالظبط اللى حققه المفتش كرومبو فى 30 يوم فى 30 يوم مده شهر رمضان وصلت ارباح الانتاج ل400 مليون جنيه مصرى اى ما يقرب من نصف مليار ..
ده المفتش كرومبو لوحده واللى ممكن نقول انه بيتمتع بنوع من المصداقيه لأن فى فائز حقيقى .....
ونتيجة لمصداقيته عند المشاهد من خلال الدعم بالظهور مع رؤساء احدى القنوات المحبوبة جدا لدى المشاهد فى رمضان قدر انه يحقق مكاسب اعلى ....
لكن على غرار كرومبو بتطلع مسابقات وحلقات ومسلسلات شبيه هدفها النصب .
بقت اى حاجة فى حياتنا ممكن نوصلها عن طريق الرقم السحرى (0900) المقال ده انا مكتبتوش علشان امدح او ازم فى كرومبو لكن علشان ننظر نظرة عميقة لواقع مجتمعنا .......
بنقول مفيش شغل والحكومة مش موفرة خدمات والنظام مش عارف ايه مع ان العيب فينا احنا بلد نامى وبنصرف 400 مليون على مسابقة واحدة ونقول مفيش فلوس مفيش شغل مفيش ومفيش والحقيقة ان مفيش وعى اصحوا يا مصريين قبل فوات الاوان ...............................