كرتون رائع عن الإنتخابات المصريه .. خد على قفاك

8 أسباب للتعاقد مع شيكابالا

واحد زملكاوى : شفت يا عم عملنا ايه فى المصرى امبارح

شوفت شيكابالا

وانتوا خسرتوا من الاسماعيلى 3

تلاااااااااااااتة

واحد اهلاوى صاحبه : اه شفت الماتش مبروك يا عمونا بقيتوا الاول فى الدورى دلوقتى 24 نقطة

الزملكاوى : اه الاول طبعا غصب عن اى حد

الاهلاوى : براحة على نفسك شوية يا عم

بس هقولك ايه

انتوا فرحانين فرحة الاهبل بما انكم متعرفوش يعنى الاول من 7 سنين

ده انتوا لو فى كلية الطب كنتوا اتخرجتوا

يعنى انت خلصت ثانوية ودخلت كلية التجارة وخلصت ومشفتوش الدورى

حقكم بصراحة تفرحوا بئة

الزملكاوى : اه طبعا هنفرح وهنغلبكم كمان فى الماتش اللى جاى

هنوريكم شيكابالا هيعمل فيكم ايه ؟

الاهلاوى : يا عم اسكت بس

مش شيكابالا ده اللى عمل نفسه عيان ومرضيش يروح المنتخب

ولعب مع الفرقة ال96 دقيقة

بتوع النادى المصرى لو بيفهموا

يقدموا احتجاج لاتحاد الكورة يخصموا منكم التلات نقط ويحسبوهم ليهم هما حسب قانون الفيفا

الزملكاوى : بس ياد

انتوا بتحقدوا علينا علشان احنا احسن منكم وعندنا لاعب احسن من الفرقة بتاعتكم كلها

الاهلاوى : انتوا عندكوا لاعب بجد والله

يا عم اسكت بس

يابنى احنا فى مئويتنا جبنا برشلونة

وانتوا فى مئويتكم بتقولوا سلفونا

لأ وعاملين خط ساخن للتبرعات

اسكت يا عم

بتلموله فلوس علشان يلعب

الزملكاوى : اه طبعا

شيكابالا برقبة الفرقة بتاعتكم كلها ... عارفه

الاهلاوى : اااااااااه شيكابالا

اسمه محمود عبد الرازق

سنه من مواليد 5 مارس 1986يعنى عنده بتاع 24 سنة

لقبه شى .. شى .. شيكابالا

مهنته لاعب كرة بنادى الزمالك لم يحرز اى بطولة محلية فى حياته ولا بطولة افريقية ولا بطولة دولية فى ماعدا بطولة كأس افريقيا بأنجولا عام 2010 البطوبة التى لم يشارك فيها الا ب28 دقيقة بس

لا معرفوش !!!!!!!!!!!!

الزملكاوى : حمرا ياد

الاهلاوى : ياااااااااااه ... هى انتوا بتناموا تحلموا بيها ؟؟

الزملكاوى : هى ايه دى

الاهلاوى : الفانلة بتاعتنا يا عم ... انت فكرك راح لفين ؟؟؟ أنا غرضى شريف

الزملكاوى : والله لنقطعكم الماتش الجاى انتوا اصلا بتحقدوا علينا والله

الاهلاوى : ليه ... علشان عندكم خطين حمر ؟؟؟!!!

الزملكاوى : اتريق براحتك ... بكرة هنوريكوا اللى عمركم ما شفتوه

الاهلاوى : احنا رجالة .. مبنشوفش الحاجات دى

الزملكاوى : هو ايه ده ؟؟؟

الاهلاوى : الماتش يا عم ... انت فكرك راح لفين ؟ انا غرضى شريف

الزملكاوى : اه الماتش ... ده حسام حسن هيخليكوا تلفوا حوالين نفسكوا

ياه لو هو وشيكابالا يمضولنا عقد مدى الحياة

الاهلاوى : انا لو منكم فعلا امضى مع شيكابالا على طول

الزملكاوى : ليه بئة

الاهلاوى : بسخرية (الجهل اشتغل بئة) أقولك يا عم

فى 8 أسباب للتعاقد مع شيكابالا:

يعنى بصراحة متعدد الاستخدامات

يعنى ممكن تحطه فى اى حتة هيشتغل برضه

الزملكاوى : هو مين ده ؟

الاهلاوى : شيكابالا يا عم ... انت فكرك راح لفين ؟؟؟ أنا غرضى شريف

السبب الاول

بيعرف يلم الكورة صح

عمره ما بيضيع كورة

يعنى عمرك ما تحدفله كورة بره الملعب وميلاقيهاش

وممكن يشتغلك فى الملعب اوفرتايم كمان

السبب التانى

بلطجى جامد اخر حاجة

يعنى ممكن يشتغل بودى جارد

السبب التالت

بيلمع جزم كويس جدا

شوف جزمته بتلمع ازاى

السبب الرابع

بتاع نسوان وهيظبطكم

يعنى دايس شارع الهرم وشارع شهاب وجامعة الدول وابو رغوة كمان

وده السبب الاهم

هيظبطك فى اى مصلحة

السبب الخامس

بيحيي افراح كمان

اه وربنا ... يعنى لو عندك فرح فى النادى

او اى لاعب واتزنق فى مطرب

ناديله هو هيقوم بالواجب

الزملكاوى : واجب ايه ؟

الاهلاوى : هيغنى يعنى يا عم ... انت فكرك راح لفين ؟؟؟ أنا غرضى شريف

السبب السادس

سواق لانشات جامد اوى

يعنى لو حبيت تطلع رحلة انت والمدام

هيكون فى الخدمة

ايه انت مجربتوش قبل كده ؟

الزملكاوى : هو ايه ده ؟

الاهلاوى : على فكرة انت انسان مستفز ومصطنع وغير محترم بالمرة

على طول فكرك يروح لحاجات كده ... مش ولابد

انا اقصد شيكابالا يا عم

انت عارفنى يا عم

اغراضى كلها شريفة

السبب السابع

بيجيب هدوم جامدة اوى من عند ابو نسمة

يعنى هيعرف يورد لكم فانلات

بدل اللى عمالين تخترعوا فى امها دى ومش عارفين تشيلوا الخطين الحمر برضه

الزملكاوى : هى ايه دى ؟

الاهلاوى : الفانلة بتاعتكم يا عم ... انت فكرك راح لفين ؟؟؟ انا غرضى شريف

السبب التامن

مكن يشتغل رقاصة

اهوه يشتغل بلقمته

لا وبيقول الفاظ سافلة كمان من اللى بتعجب الجمهور بتاعكم

يا عم الحمد لله انى اهلاوى

مكتوب عالجبين بالدم ناس تمشى شايلة الهم محرومة من الافراح

منعرفش غير الاخلاق والادب والاحترام

خليهولوكوا

بس فرحونا بئة وخدوه

الزملكاوى : هو ايه ده

الاهلاوى : الدورى يا عم ... انت فكرك راح لفين ؟؟؟ أنا غرضى شريف !!!!!!!!!!!!!!!!!!!!!!!

كفاية يا بدرى ... الاهلى كبير عليك

بما انى رياضى ... فأنا مش متعود اكتب مقالات رياضية ... مقالاتى كلها سياسية او سياسية اجتماعية

لأيمانى بان التحليل الرياضى وجهات نظر ........

لكن فى بعض المواقف بتتعدى وجهات النظر الرياضية ... الى الاستفزاز الغير مبرر ...

وقد ثبتت صحة المواقف ... التى تعدت كونها مواقف الى حقائق

بداية ... انا اهلازى صميم ... بشجع الاهلى من ساعة ما عرفت يعنى ايه كورة

مخترتهوش

لكن اتولدت لقيت نفسى اهلاوى

النهارده 17 اكتوبر خروج النادى الاهلى من بطولة افريقيا ابطال الدورى

امام منافسه نادى الترجى التونسى باستاد 7 نوفمبر بمدينة رادس التونسية

انا مش هتكلم عن الحكم ... او الهدف اللى احرزه انيرامو لاعب نادى الترجى التونسى نيجيرى الجنسية

اللى تعمد احرازه بأيده

لكن انا عاوز اتكلم عن اسوء مدرب فى تاريخ النادى الاهلى

الا وهو ( حسام البدرى )

اولا ... اثبتت الايام ان فترة تولى حسام البدرى لمهمة تدريب الفريق الاول لكرة القدم بالنادى الاهلى

انها اسوء فترات النادى على الاطلاق

بصرف النظر عن حسم النادى الاهلى لبطولة الدورى فى اول موسم لتوليه المسئولية

فالنادى الاهلى حسم البطولة بخبرات لاعبيه

حسام البدرى مدرب لا يقوى على ادارة او قيادة فريق بحجم وثقل النادى الاهلى

فقد اثبتت النتائج ان هذا المدرب لا يجيد التعامل مع مباريات البطولات

صاحب فكر شاذ ... يريد ان يثبت للجميع انه الامثل فى فترة توليه وانه الاجدر بتولى مهمة تدريب الفريق

بيحاول يتقمص شخصية الممثل القدير ( احمد مكى ) فى فيلم طير انت

لما كان احمد مكى متقمص شخصية الكابتن ( حسن شحاتة ) فى المشهد بتاع مباراة مصر والسنغال

لما سحب ميدو من المباراة ودفع بعمرو زكى بدلا منه

وتعدى ميدو بالالفاظ على احمد مكى بسبب سحبه من المباراة

وبعدين عمرو زكى احرز هدف الفوز على السنغال بعد نزوله الملعب بدقايق

ساعتها وقف احمد مكى وقال : ( أنا صح ... أنا صح ... أ،ا اللى جبته من انبى ... أنا صح )

ده المشهد الوحيد اللى اقدر امثل بيه الشخصية اللولبية لحسام البدرى

اثبتت النتائج كما ذكرنا ان هذا الشخص لا يجيد التعامل مع مبارايات البطولات او المبارايات خارج ارضه

اولا مبارايات البطولات

المباراة الاولى :

مباراة الاهلى وحرس الحدود ضمن بطولة السوبر المصرى لعام 2009

خسر الاهلى الماتش ده بنتيجة 2/صفر

مع العلم بعدم التقليل من شان فريق مخضرم مثل حرس الحدود

المباراة الثانية :

مباراة الاهلى وحرس الحدود بنهائى كأس مصر عام 2010

خسر الاهلى 4/3 بركلات الترجيح

المباراة الثالثة :

الاهلى وحرس الحدود ضمن بطولة السوبر المصرى 2010

فاز الاهلى 1/صفر بهدف ابو تريكة بكرة قدرية لولا انها اتت للاعب مثل ابو تريكة

لكن الفوز الثالث على التوالى لنفس الفريق

مما يدل على تعتيم الظل الفكرى للتعامل مع مباراة بطولة طرفها الاخر هو نفس الفريق لمدرب كهذا

ليدلى القدر لنا لسانه حتى تكشف الاقدار عن القدرات الحقيقية لمدرب قليل الموهبة

المباراة الرابعة :

الاهلى والاتحاد الليبى بليبيا

فوز الاتحاد الليبى 2/صفر على النادى الاهلى

المباراة الخامسة :

الاهلى وهارتلاند النيجيرى بنيجريا

تعادل الاهلى وهارتلاند 1/1 من ضربة جزاء احرزها ابو تريكة

المباراة السادسة :

الاهلى وشبيبة القبائل الجزائرى بالجزائر

فوز شبيبة القبائل الجزائرى 1/ صفر

المباراة السابعة :

الاهلى والترجى التونسى بتونس

فوز الترجى التونسى على النادى الاهلى 1/صفر

انا مش بسرد خيبة الفريق فى عهده

لكن دى الارقام والحسابات

يعنى دى حقائق

بدون الخوض فى تفاصيل

لأن كل مباراة ليها ظروفها

لكنه بعد اللى حصل فى مباراة الاهلى والترجى التونسى بتونس

كتب شهادة وفاته فى قلوب ملايين من جماهير النادى الاهلى العاشقة والمؤيدة للفريق

لانه اثبت انه يهمه زعل فلان وعلان على مصلحة الفريق

لما يكون مثبت لاعب زى شهاب الدين احمد اربع مبارايات فى ارض الملعب

لأيقاف حسام غالى افريقيا

ولما يرع حسام وهو مش فى حالته يشركه عادى تماما

ولكنه اكتشف انه فى حاجة للاعب الشاب

ولكن لضيق الوقت

لا نملك ان نلوم شهاب الدين احمد

كما ان التغيير الاول فى المباراة

باستبدال سيد معوض

قتل الجهة اليسرى بعد طرد بركات

ولكن لن نتطرق للمحات الفنية

لأنها وجهات نظر

ولكن يحسب ليه

اختيار وتصعيد عناصر شابة

مش علشان مصلحة الفريق

لكن لتلافى ما انتقد الصحفيون به المدرب السابق الساحر البرتغالى مانويل جوزيه

وتحسب ايضا له نظرته فى اللعب فرانسيس

مش فاضل الا فرصة أخيرة لتعويض الفائت

الدورى + الكاس + السوبر المصرى

اذا اردت الاستمرار فى قلوب جماهير الاهلى الوفية

فيما عدا ذلك

رجاء ... ياريت تقدم استقالتك وتمشى

كفاية يا بدرى ... الاهلى كبيرعليك

بلاغ للنائب العام

ده كان عنوان ايفنت عالفيس بوك ... دخلت ... وياريتنى ما دخلت ... لما دخلت قرأت الفاتحة على بلدنا ... لما لقيت البلاغ مضمونه دعوى لأغلاق قناة نسائم الرحمة ...

الغريب انى مقرأتش الفاتحة علشان هيقفلوا القناة ... ولكن لسبب أقامة الدعوى ... السبب هو ان الشيخ محمد حسان أجاز بيع الاثار ... طبعا مصدقتش الا لما شفت وسمعت الفتوى صوت وصورة ... قبل ما نناقش موضوع الفتوى ... هقولكم نص او مضمون الفتوى :

" بيع الاثار حلا ل شرعا ...اذا وجدتها فى بيتك او فى أرضك ... فهى ملك لك ... رزق ارسله الله اليك ... اذا وجدتها على هيئة ذهب او فضة فهى ملك لك تتصرف فيها كما شئت ... أما اذا كانت على هيئة تماثيل او ما شابه ... فواجبك ان تطمسها ... اما اذا كانت الاثار ملك للدولة ... فليس من حقك ان تعتدى عليها ولا حق لك فى التصرف فيها ... "

بعد ما خلص الفيديو فضلت 10 ثوانى على الاقل مش عارف اصدق ولا اشغل الفيديو تانى يمكن الكلام يتغير ...

ناخد الموضوع من الاول .. أولا الشيخ محمد حسان بيعتبر عند كتير من الناس رمز يحتذى به ... وقدوة فى كلامه وتصرفاته ... فتواه بتعتبر سيف او أمر عند كتير من الناس ... ونظرا لما يتمتع به الشيخ من شعبيه هائلة ... وخصوصا فى طبقة الناس الغلابة ... كان المفروض انه يراعى الموقف والوضع الاجتماعى الذى وضع نفسه فيه ... فمش من حقه انه يستخدم منبره الخاص فى أصدار فتاوى من السهل انها تشجع الناس على اتباع اساليب غير قانونية واللى بدورها ممكن تعمل على زيادة الفوضى فى بلد مش ناقصة فوضى ...

ثانيا ... الفتوى بايجاز بيع الاثار حتو ولو كانت ضمن ملكيات خاصة بتعد عدم مسئولية ... لأن الاثار دى ملكية عامة ... تراث وتاريخ من حق كل مصرى انه يستمتع بالنظر والتعرف اليه ...

يعنى لو ماشى فى الشارع ولقيت شنطة فلوس ... المفروض انى اوصلها لصاحبها ... واذا مكنتش اعرف صاحبها ... يبقى واجبى انى اوصلها للى ممكن يوصلها لصاحبها ... مش معنى انى انا اللى لقيتها انى اعتبرها ملكى ... اتصرف فيها كما شئت ... والا يعتبر ده خيانة للأمانة ....

ثالثا ... الشيخ افتى بأن الاثار لو كانت دهب او فضة يبقى على واجدها انه يتصرف فيها كما شاء ... يبيعها ويستفيد بتمنها

أما لو كانت على هيئة تماثيل او ما شابه يبقى على واجدها طمسها ...

وهنا كنت عاوز اقف شوية ...

اللى هيلاقى التمثال الاثرى ( واخدين بالكم من الاثرى دى ) ويكسره او يطمسه كما اجاز الشيخ يبقى بيطمس تاريخ وحضارة بلد بأكملها

... ضيع مجهود ناس تعبت علشان تبنى الحضارة دى

وبعدين انا وعلى الرغم من عدم علمى فى الدين الا بما يميزنى كمسلم عن اصحاب الديانات الاخرى

اعرف ان التماثيل كانت تطمس قبل كده لأنصراف الناس عن عبادة الله الواحد ... وعبادة تماثيل هما اللى صنعوها

أما دلوقتى ... عصر الشرك وعبادة الاصنام انتهى ... ولا فائدة من طمس او تكسير التماثيل بغرض التخلص منها

ثالثا ... انا من انصار الاتجاه اللى بيطالب بمنع عدم المتخصصين من اصدار الفتوى

والشيخ محمد حسن بكاريوس اعلام ... جامعة القاهرة ...

طبعا الشيخ محمد حسان عالم جليل كلنا نجله ونحترمه ... ويحسب ليه انه ثقف نفسه بنفسه ... ما هو ايام الرسول مكانش فى ازهر ولا كليات او جامعات ... مكانش فى غير الكلية المحمدية

لكن للأسف بعد كل اللى سمعناه واللى بنسمعه كل يوم ... لازم نصر على الوقوف على ادعاءات البعض بالعلم فى زمن اصبح فيه العلم مصطلح يباع ويشترى .............